Leita
Finnur þú það ekki? Prófaðu leitina :)

Bæir og þorp

holmurinn.png
Bæir og þorp

Þéttbýlisstaðirnir á Vesturlandi eru eins fjölbreyttir og þeir eru margir. Alls eru 10 staðir með fleiri en 50 íbúa og er Akranes fjölmennasti þéttbýliskjarninn með rúmlega 6.600 íbúa. Flestir bæir liggja við sjávarsíðuna þar sem aðalatvinnuvegir hafa þróast í kringum sjósókn og útgerð. Aðrir staðir hafa byggst upp á þjónustu við landbúnaðinn svo sem Borgarnes og Búðardalur en Hvanneyri og Bifröst byggjast upp vegna öflugra skóla á stöðunum en það eru Landbúnaðarháskólinn á Hvanneyri og Háskólinn á Bifröst. Sveitarfélögin fimm á Snæfellsnesi, Eyja- og Miklaholtshreppur, Grundarfjarðarbær, Helgafellssveit, Snæfellsbær og Stykkishólmsbær, ásamt Snæfellsjökulsþjóðgarði fengu Green Globe umhverfisvottun samfélaga árið 2008. Vottunin var endurnýjuð í júlí 2010 og heitir nú Earth Check. Svæðið var fyrsta samfélagið í Evrópu til þess að hljóta slíka vottun og það fjórða í heiminum. Öll stærri bæjarfélögin leggja æ ríkari áherslu á öfluga ferðaþjónustu þar sem fjölbreytt afþreying og þjónusta er í boði.

Búðardalur

Búðardalur er þjónustumiðstöð Dalanna og eru íbúar 255.

Á seinni árum er Búðardalur þekktur fyrir ostagerð en MS hefur verið með vinnslustöð þar í mörg ár.

Dalirnir eru sögufrægt hérað þar er meðal annars sögusvið Laxdælu og Sturlungu.

Eiríksstaðir í Haukadal eru 17 km frá Búðardal. Þar er hægt að kynnast víkingatímanum á lifandi hátt, leiðsögumenn klæðast víkingaklæðum og kynna fornt handverk um leið og þeir segja sögu staðarins.

Að Eiríksstöðum er einnig tilgátuhús byggt á rústum að öllum líkindum frá tíma Eiríks rauða og Þjóðhildar, foreldra Leifs heppna.

Frá Búðardal til Reykjavíkur eru 153 km.

Upplýsingamiðstöð, gistiheimili, tjaldsvæði, veitinga- og kaffihús.

Borgarnes

Borgarnes tengist Egilssögu órjúfanlegum böndum.

Höfuðpersóna Eglu kemur víða við í örnefnum bæjarins. Í skrúðgarðinum Skallagrímsgarði er minnismerki sem sýnir Egil flytja lík Böðvars sonar síns, sem drukknaði í Hvítárósum. Vestan við Borgarnes er Brákarey sem kennd er við Þorgerði brák ambátt á Borg sem ól Egil Skalla-Grímsson upp fyrstu árin.

Landnámssetur Íslands er í Borgarnesi skammt frá Brákarey og þar er hægt að kynnast Egilssögu og landnámssögunni í nútímaútfærslu.

Listaverkið Brák eftir Bjarna Þór Bjarnason er skammt frá Brákarsundi.

Bjössaróló er skemmtilegur heimatilbúinn leikvöllur þar sem börn af öllum aldri geti skemmt sér í fallegu umhverfi. Leikvöllurinn er við endann á Skúlagötu vestast í bænum.

Safnahúsið í Borgarnesi er með mjög áhugaverða og óvenjulega sýningu sem heitir Börn í 100 ár og sýningu með íslenskum fuglum.

Frá miðbæ Reykjavíkur til Borgarness eru 75 km.

Upplýsingamiðstöð, hótel, gistiheimili, farfuglaheimili, tjaldsvæði, kaffihús, söfn, setur, leikhús, sundlaug og 18 holu golfvöllur, Hamarsvöllur 3 km frá Borgarnesi.

Stykkishólmur

Stykkishólmur á sér yfir 400 ára sögu sem verslunarstaður og hafa mörg gömul hús verið gerð upp og eru mikil bæjarprýði.
Árið 1845 hóf Árni Thorlacius veðurathuganir þar og er þar elsta veðurathugunarstöð landsins. Fyrir utan lögreglustöðina er minnismerki um veðurathugunarstöðina og þar er hægt að fylgjast með veðurtölum dagsins.
Í Stykkishólmi má finna hótel, farfuglaheimili, heimagistingar, tjaldsvæði, fjölbreytt veitinga- og kaffihús, söfn, sundlaug með einstöku vatni, bátsferðir um fjörðinn og 9 holu golfvöll.
Frá Stykkishólmi til Reykjavíkur eru 172 km.

EDEN Stykkishólmur
Stykkishólmsbær var útnefndur EDEN-gæðaáfangastaður í Evrópu 2011 fyrir varðveislu og endurnýjun menningarminja og metnaðarfulla stefnu í sjálfbærri þróun í ferðaþjónustu.
Viðurkenninguna fær bæjarfélagið vegna markvissrar uppbyggingar gömlu húsanna í bænum sem gengið hafa í endurnýjun lífdaga og öðlast nýtt hlutverk í ferðaþjónustu, þar sem sjálfbærni- og umhverfishugsun er í forgrunni.

EDEN-gæðaáfangastaðir ,,European Destination of Excellence" er samevrópskt verkefni sem Ferðamálastofa heldur utan um fyrir Íslands hönd. Markmið þess er að vekja athygli á gæðum, fjölbreytileika og sameiginlegum einkennum evrópskra áfangastaða og kynna til sögunnar nýja, lítt þekkta, áfangastaði vítt og breitt um Evrópu þar sem áhersla er lögð á ferðaþjónustu í anda sjálfbærni.

Akranes

Akranes er stærsta bæjarfélagið á Vesturlandi þar sem búa um 6630 manns.

Það tekur einungis um 45 mín að keyra frá Reykjavík upp á Akranes ef farið er um Hvalfjarðargöng. Daglegar strætisvagnaferðir eru á milli Reykjavíkur og Akraness.

Strandlengjan meðfram Akranesi er sérlega fjölbreytt og skemmtileg. Langisandur með sinn ljósa sand þar sem hægt er að byggja sandkastala af öllum stærðum og gerðum. Yst á Skaganum eru tveir vitar og útsýni þaðan mjög fagurt.

Á Breiðinni á Akranesi er að finna tvo fallega vita. Árið 1918 var byggður steinsteyptur viti yst á Syðriflös á Akranesi eftir teikningu Thorvalds Krabbe verkfræðings. Ljóshúsið var smíðað úr járnplötum úr Goðafossi sem strandaði undir Straumnesfjalli árið áður. Árin 1943 - 1944 var reistur nýr 19,2 metra hár viti eftir teikningu Axels Sveinssonar verkfræðings. Gaman er að fara upp í nýja vitann og er útsýnið úr honum einstakt. Haldnir hafa verið ýmsir viðburðir í nýja vitanum tónleikar og listasýningar.

Á Safnasvæðinu að Görðum er hægt að sjá fjölda báta, gömul hús með sál, einstakt steinasafn og Íþróttasafn Íslands sem sómir sér vel í íþróttabænum Akranesi.

Skógræktin og mjög góður 18 holu golfvöllur, Garðavöllur eru í næsta nágrenni við Safnasvæðið.

Gistiheimili, tjaldsvæði,veitinga- og kaffihús, söfn, gönguleiðir, sundlaug og 18 holu golfvöllur.

Hvanneyri

Hvanneyri er hluti af landnámi Skalla-Gríms Kveld-Úlfssonar.

Þar er nú ört vaxandi byggðakjarni í tengslum við Landbúnaðarháskóla Íslands og búa þar rúmlega 250 manns en nokkuð fleiri á veturna.

Bændaskóli var stofnaður að Hvanneyri 1889 þannig að margir íslenskir bændur hafa sterkar taugar til staðarins.

Hvanneyri hefur öldum saman verið kirkjustaður og þar er falleg lítil kirkja reist 1905 eftir teikningu Rögnvaldar Ólafssonar með sérstæðri altaristöflu.

Landbúnaðarsafn Íslands, sem er safn með landbúnaðarvélum fyrri alda er á staðnum og einnig Ullarselið, sem er handverksverslun með hágæða íslenskt handverk.

Á Hvanneyri er verndað búsvæði blesgæsarinnar, sem er áberandi fugl á túnum staðarins vor og haust.

Frá Hvanneyri til miðbæjar Reykjavíkur eru 80 km.

Grundarfjörður

Heimabær hins stórkostlega Kirkjufells

Kirkjufell, bæjarfjall Grundarfjarðar, er eitt af þekktustu fjöllum Íslands ef ekki heimsins alls. Ekki er óalgengt að erlendir ljósmyndarar heimsæki Ísland í þeim tilgangi einum að mynda þetta einstaka fjall. Kirkjufell hefur meira að segja farið með hlutverk í stórum Hollywood myndum.

Þegar ferðamenn, og þeim fer fjölgandi, hafa sett lokið á linsuna við Kirkjufellið á komast þeir fljótt að því að Grundarfjörður hefur ekki einungis upp á stórkostlega fallegt fjall að bjóða. Umlukin stórkostlegri náttúru með fegurstu fossum landsins og stórkostlegu dýralífi kúrir bærinn sig við fjallsræturnar þar sem Helgrindur tróna við himinn. Ekki er óalgengt að sjá vinsæla gesti úr hafi líta við og sýna sig. Má þar helst nefna seli og háhyrninga. Á fallegum sumardögum geta gestir farið í siglingu, notið stórfenglegs útsýnis, rennt fyrir fiski, kíkt á lunda og aðra sjófugla. Ef hafið heillar ekki er hægt að fara í hringferð um Snæfellsnesið með rútu þar sem boðið er upp á leiðsögn.

Segja má að Grundarfjörður sé miðbær Snæfellsness, liggur mitt á milli Stykkishólms og Ólafsvíkur á norðanverðu Snæfellsnesi. Í bænum er mikið úrval af gististöðum, glæsilegt hótel, hostel, heimagisting, sumarhús og svo auðvitað tjaldsvæði og sundlaug.

Sundlaugin er aðeins einn af áhugaverðum afþreyingarmöguleikum sem Grundarfjörður hefur upp á að bjóða. Einnig má nefna golfvöllinn, hestaleigur, kaffihús, veitingastaði og upplýsingamiðstöð ferðamanna. Rekin er glæsileg matvöruverslun á staðnum ásamt áfengisverslun og apóteki.

Þrátt fyrir að flestir ferðamenn komi landleiðina þá koma þúsundir á hverju ári með skemmtiferðaskipum sem leggja að Grundarfjarðarhöfn. Grundarfjarðarhöfn leggur sig fram við að taka vel á móti skemmtiferðaskipum og gera dvölina sem eftirminnilegasta fyrir farþega þeirra. Fjöldi skipa hefur aukist mikið síðustu ár, frá tveimur skipum árið 2001 í þrjátíu skip sumarið 2015.

Á sumrin lifnar virkilega yfir bænum. Víkingafélagið Glæsir hefur komið sér upp skemmtilegri aðstöðu í miðjum bænum og eru viðburðir víkinganna oftar en ekki hápunktur dagsins að mati gesta skemmtiferðaskipanna.

Á bæjarhátíðinni, Á góðri stund, sem haldin er síðustu helgina í júlí ár hvert, skrýðist bærinn hverfalitunum sem eru rauður, blár, gulur og grænn. Hátíðin er sannkölluð fjölskylduhátíð þar sem gestir á öllum aldri ættu að finna eitthvað við sitt hæfi.

Grundarfjörður tekur vel á móti ykkur í sumar. Verið velkomin.

Ólafsvík

Ólafsvík er útgerðarstaður með góða höfn.

Gamalt pakkhús frá 1844 stendur í miðbænum og er nú friðlýst. Þar er nú minjasafn sem sýnir verktækni liðins tíma.

Í Bæjargili er fallegur foss, Bæjarfoss og stutt er frá Ólafsvík í Þjóðgarðinn Snæfellsjökul og á Snæfellsjökul sjálfan.

Frá Ólafsvík til Reykjavíkur eru 195 km.

Upplýsingamiðstöð, hótel, gistiheimili, tjaldsvæði, veitingahús, safn, sundlaug og 9 holu golfvöllur.

Hellissandur og Rif

Á Hellissandi var fyrrum mikil útgerð en verslunarhöfn var á Rifi.

Í dag er mjög góð höfn í Rifi og er útgerð aðal atvinnuvegurinn á báðum stöðum en stutt er milli þessara bæja aðeins um 2 km.

Sjóminjasafn er á Hellissandi og þar er meðal annars elsta áraskip sem til er á Íslandi, Bliki, en hann var smíðaðir 1826.

Á svæðinu milli Hellissands og Rifs er mikil fuglaparadís og eitt mesta kríuvarp á landinu.

Þjóðgarðurinn Snæfellsjökull er við bæjardyrnar á Hellissandi.

Frá Hellissandi til miðbæjar Reykjavíkur eru 195 km.

Hótel, tjaldsvæði, veitingahús,kaffihús og safn.

Bifröst

Bifröst er háskólaþorp þar sem búa um 200 manns.

Háskólinn á Bifröst á rætur að rekja til Samvinnuskólans sem var stofnaður árið 1918 í Reykjavík. Sumarið 1955 var skólinn fluttur að Bifröst.

Fram til 1990 var skólinn deild innan Sambands íslenskra samvinnufélaga og í eigu þess. Frá 1990 hefur skólinn verið sjálfseignarstofnun.

Skólinn hefur breyst mikið frá stofnun og hafa þær breytingar verið í takt við breyttar aðstæður og auknar menntunar­kröfur samfélagsins.

Margar náttúruperlur eru í næsta nágrenni staðarins.

Frá Bifröst til Reykjavíkur eru 107 km.

Veitingahús og 9 holu golfvöllur, Glanni er skammt frá.

Hvalfjörður

Hvalfjörður er einn lengsti fjörður landsins. Landslagið er fjölbreytt, bæði allmikið undirlendi en einnig snarbrattar hlíðar formfagurra fjalla og vogskornar og lífauðugar strendur. Náttúrufegurð er víða allmikil og möguleikar óþrjótandi til að njóta frábærrar útiveru í nágrenni við höfuðborgarsvæðið. Vesturlandsvegur liggur eftir endilöngu sveitarfélaginu frá Hvalfjarðargöngum að Borgarfjarðarbrú. Þar er að finna eina stærstu höfn landsins og tvö stóriðjuver. Flestir íbúar búa í dreifbýli, en þó eru þéttbýliskjarnar í Melahverfi, Hlíðarbæ og víðar. Sveitarfélagið rekur einn leikskóla, Skýjaborg, í Melahverfi og einn grunnskóla, Heiðarskóla, í landi Leirár í Leirársveit. Íbúar Hvalfjarðarsveitar voru 683 talsins þann 1. desember 2007.

Borgarfjörður

Borgarfjörður og Mýrar er svæði rómað fyrir náttúrufegurð. Fjölbreytni er mikil í náttúrunni og þar er auðvelt að upplifa fossa,fjöll, hraun og skóga, heita hveri og jökla. Fjölbreyttir útivistarmöguleikar. Sagan drýpur af hverju strái og fjölmörg söfn, setur og menningartengd þjónusta er á svæðinu.

Snæfellsnes

Snæfellsnes býður upp á fjölbreytt og töfrandi landslag.
Nesið er um 90 km langt prýtt háum og oft á tíðum hrikalegum fjallgarði, sem mótast hefur við eldgos og jökulrof. Yst á fjallgarðinum trónir hinn dulmagnaði Snæfellsjökull og umhverfis hann er yngsti þjóðgarður landsins, Þjóðgarðurinn Snæfellsjökull. Á Snæfellsnesi má finna ölkeldur, hvítar strendur, lífleg fuglabjörg, skemmtileg þorp og bæi. Brim og eyjar, einstakar gönguleiðir og fjölbreytt afþreying gerir ferð á Snæfellsnes sannarlega að ævintýri.

Vesturland

Þéttbýli
Þéttbýlisstaðirnir á Vesturlandi eru eins fjölbreyttir og þeir eru margir. Alls eru 10 staðir með fleiri en 50 íbúa og er Akranes fjölmennasti þéttbýliskjarninn með rúmlega 6.600 íbúa.

Öll stærri bæjarfélögin leggja æ ríkari áherslu á öfluga ferðaþjónustu þar sem fjölbreytt afþreying og þjónusta er í boði. 

Bæir og þorp

Map Hellissandur, Rif Grundarfjörður Stykkishólmur Búðardalur Dalir Arnarstapi Hellnar Snæfellsnes Bifröst Húsafell Reykholt Borgarfjörður Hvanneyri Borgarnes Hvalfjörður Akranes Ólafsvík