Leita
Finnur þú það ekki? Prófaðu leitina :)

Saga og menning

Bárðarlaug

Bárðarlaug er sporöskjulaga tjörn í gjallgíg vestanvert við veginn að Hellnum.

Sagan segir að Bárðarlaug sé baðstaður Bárðar Snæfellsáss. Bárður var af risaættum, stór og sterkur. Hann nam land á Snæfellsnesi og kallaði jökulinn Snjófell og Snæfellsnesið Snjófallaströnd.

Hann lenti í útistöðum við frændur sína og nágranna og lét sig hverfa en talið er að hann hafi gengið í jökulinn. Upp frá því fóru menn að ákalla hann og hlaut hann þá nafnið Snæfellsás.

Á Arnarstapa er áberandi hlaðið minnismerki um Bárð Snæfellsás eftir listamanninn Ragnar Kjartansson. Eftir að hafa litið á listaverkið er auðskilið að hann hafi þurft stóra baðaðstöðu!

Borg á Mýrum

Borg á Mýrum er kirkjustaður og prestssetur. Þar bjó Skalla-Grímur Kveld-Úlfsson, faðir Egils Skalla-Grímssonar og síðar Egill og margir ættmenn hans og niðjar, meðal annars bjó Snorri Sturluson þar um skeið.

Minnismerkið Sonatorrek eftir Ásmund Sveinsson var reist á Borg 1985.

Núverandi kirkja að Borg var reist 1880. Altaristafla kirkjunnar er eftir enska málarann W.G. Collingwood sem hann málaði eftir Íslandsferð sína 1897.

Brákarey

Brákarey er lítil klettaey fram af Borgarnesi og er eyjan tengd við land með brú yfir Brákarsund.

Eyjan er sögð nefnd eftir Þorgerði brák, sem var ambátt á Borg og fóstra Egils Skallagrímssonar. Í Egils sögu segir að Skallagrímur Kveldúlfsson á Borg, faðir Egils, hafi banaði Þorgerði brák á Brákarsundi með steinkasti.
Frá bryggjunni í Brákarey er fallegt útsýni.

Dagverðarnes

Auður djúpúðga kom þar, er hún var að leita að öndvegissúlunum sínum og snæddi dögurð.

Lítil kirkja frá 1934 er að Dagverðarnesi. Kirkjan var byggð úr við eldri kirkju frá 1848.

Húsafriðunarnefnd samþykkti árið 2009 að Dagverðarneskirkja skuli sett á skrá nefndarinnar yfir friðuð hús.

Djúpalónssandur

Djúpalónssandur er skemmtileg malarvík með ýmsum furðulegum klettamyndunum.

Á árum áður var þar útgerð og verbúðarlíf og þótti mönnum þar reimt. Frá þeim tíma eru 4 aflraunasteinar sem liggja undir kletti þegar komið er niður á sandströndina; Fullsterkur 154 kg, Hálfsterkur 100 kg, Hálfdrættingur 54 kg, Amlóði 23 kg. Vinsælt er að reyna krafta sína á steinunum.

Breski togarinn Epine GY 7 frá Grímsby fórst í aftakaveðri fyrir utan Djúpalónssand í mars 1948. Fimm skipsverjar lifðu slysið af en 14 manns fórust. Járn úr skipinu er á víð og dreif um sandinn.

Eiríksstaðir

Eirikur rauði og konan hans Þjóðhildur reistu sér bú að Eiríksstöðum í Haukadal eftir því sem segir í Eiríks sögu rauða. Þar er talið að Leifur heppni og bræður hans séu fæddir.

Eiríkur var gerður útlægur af Íslandi fyrir víga sakir og leitaði þá landa í vestri. Fann hann land er hann nefndi Grænland. Þangað flutti hann með fjölskylduna árið 985 eða 986 og fjöldi fólks fylgdi honum.

Leifur kannaði Vínland árið 1000, fyrstur Evrópubúa, nær 500 árum á undan Kólumbusi. Leifur heppni er því meðal merkustu landkönnuða sögunnar. ´

Rústir Eiríksstaða voru kannaðar fyrir miðja síðustu öld og aftur 1997-1999. Kom þá í ljós skáli frá 10. öld og eru rústir hans sýnilegar. Skammt frá rústunum var reist tilgátu sem var vígt árið 2000, á 1000 ára afmæli landafunda Leifs í Ameríku. Við bygginguna var lögð áherslu á að styðjast við rústirnar, rannsóknir og fornt verklag.

Í bænum er lifandi starfsemir og fólk klætt að fornum sið fræðir gesti. Þá eru söguskilti á svæðinu og stytta af Leifi eftir Nínu Sæmundsson.

Fiskibyrgi

Skammt frá Gufuskálum má finna rústir á annað hundrað byrgja þar sem fiskur var þurrkaður og geymdur en á Gufuskálum var verstöð.

Byrgi þessi eru talin vera 500 - 700 ára gömul.

Um 10 min. ganga er frá veginum við Gufuskála (vegnúmer 574) upp að nokkuð heillegu byrgi sem má skríða inn í. Að innan er byrgið manngengt.

Flatey á Breiðafirði

Flatey á Breiðafirði er stærsta Vestureyjan á Breiðafirði og tilheyra henni alls 40 eyjar og hólmar. Hún er talin að hafa myndast undir afli skriðjökla á ísöld og þegar jökulfarginu létti hafi hún risið upp úr sæ. Flatey er um 2 km á lengd og um hálfur km þar sem hún er breiðust. Eyjan er flatlend, þó gengur hæðarhryggur eftir henni endilangri. Lundaberg er hæsti hluti hennar, nærri norðausturenda hennar. Mikil náttúrufegurð og friðsæld er í eyjunni og stundum eins og tíminn standi í stað.Siglingar eru út í eyjuna með fyrirtækinu Sæferðum frá Stykkishólmi.

Geirshólmi

Í Geirshólma höfðust við Hólmverjar, vel á annað hundrað manns, ræningjalið undir forystu Harðar Grímkelssonar en sagt er frá þeim köppum í Harðar sögu Hólmverja.

Helga kona Harðar bjargaði sér og tveimur sonum þeirra, Birni 4 ára og Grímkatli 8 ára með því að synda úr Geirshólma og í land og heitir það nú Helgusund.

Á Sturlungaöld settist liðsflokkur Sturlu Sighvatssonar í Geirshólma undir forystu Svarthöfða Dufgussonar og fóru þeir þaðan um sveitir með ránhendi.

Ferðaþjónustan á Bjarteyjarsandi sem er örskammt frá býður upp á leiðsögn um Harðar sögu Hólmverja.

Geirshólmi gengur einnig undir nafninu Geirshólmur.

Guðrúnarlaug

Í Laxdælu er sagt frá því að Guðrún Ósvífursdóttir hafi löngum dvalið við laug á Laugum í Sælingsdal. Í Sturlungu er getið um baðlaugina og svo virðist sem hún hafa verið mikið notuð.

Talið er að laugin hafi eyðilagst í skriðuhlaupi en árið 2009 var hlaðin ný laug í nágrenni þess þar sem sú eldri er talin hafa verið og nefnist hún Guðrúnarlaug. Þá var einnig hlaðið blygðunarhús þar sem hafa má fataskipti.

Laugin er opin allt árið og er frítt í hana.

Hallgrímskirkja í Saurbæ

Íslenska þjóðin reisti kirkjuna 1957 í minningu sálmaskáldsins Hallgríms Péturssonar sem sat staðinn 1651-1659. Hallgrímskirkja í Reykjavík er einnig nefnd eftir honum.

Séra Hallgrímur var afkastamikið skáld en þekkstasta verk hans er án efa Passíusálmarnir sem rekja píslarsögu Jesú Krists.

Passíusálmarnir hafa verið lesnir árlega á Rás 1. Megas hefur samið tónlist við þá og flutti hana í Hallgrímskirkju um páskana 2007.

Sálmurinn "Allt eins og blómstrið eina" er fluttur við útför flestra Íslendinga en séra Hallgrímur orti hann eftir lát Steinunnar dóttir sinnar.

Séra Hallgrímur kvæntist Guðrúnu Símonardóttur, Tyrkja - Guddu en þau kynntust í Kaupmannahöfn er hún hafði losnað frá alsírskum sjóræningjum sem höfðu rænt henni ásamt fleirum frá Vestmannaeyjum.

Steinunn Jóhannesdóttir hefur gert leikgerð um Guðrúnu Símonardóttir og flutt í Hallgrímskirkju fyrir nokkrum árum.

Steindir gluggar eftir Gerði Helgadóttur eru í kirkjunni og eru þeir einstakt listaverk. Kirkjan er teiknuð af Sigurði Guðmundssyni.

Helgafell

Fornfrægt fjall (73 m) þaðan er fagurt útsýni yfir Breiðafjörð.

Þjóðtrúin segir að þrjár óskir uppfyllist ef maður lítur aldrei um öxl og mælir ekki orð af munni meðan gengið er á fjallið. Óskirnar mega einungis vera góðs hugar, engum má segja þær og biðjandi þarf að horfa til austurs.

Upp á Helgafelli er útsýnisskífa svo auðvelt er að átta sig á fjallahringnum.

Núverandi kirkja á Helgafelli var reist 1903 og tekur 80 manns í sæti.

Guðrún Ósvífursdóttir, ein helsta sögupersóna Laxdælu bjó síðari hluta ævi sinnar á Helgafelli. Þar var hún greftruð að írskum sið. Á leiðinu er minnisvarði gerður úr steini úr Helgafelli með ártalinu 1008, en steinninn var settur á leiðið 1979.

Árið 1184 var klaustur af Ágústínusarreglu flutt frá Flatey að Helgafelli og eftir það var staðurinn menntasetur og höfuðstaður bóklegrar iðju á Vesturlandi.

Upp á Helgafelli er tóft, hlaðinn úr hellugrjóti sem talin er vera rúst af kapellu munkanna.

Hellnar

Hellnar var um aldir ein af stærstu verstöðvunum á Snæfellsnesi.

Bergrani austan við höfnina heitir Valasnös en þar er hin rómaði hellir sem nefnist Baðstofa. Litbrigði í hellinum eru mjög breytileg eftir birtu og sjávarföllum, fallegastur er hann talinn vera snemma morguns í sólskini á háflóði.

Ásgrímsbrunnur á Hellnum er kenndur við Ásgrím Hellnaprest (1758-1829). Hann hjó brunn í bergið þar sem aldrei hafði áður verið vatn.

Hellnar er vinsæll áningarstaður ferðamanna í mestu nálægð jökulsins og þar er einnig hótel og kaffihús.

Hvammur í Dölum

Um 890 nam Auður djúpúðga Dalalönd frá Dögurðará í utanverðri Hvammsveit til Skraumuhlaupsár í Hörðudal.

Bústað sinn reisti hún í Hvammi og þar bjuggu ættingjar hennar um langan tíma.

Auður var kristin kona. Ættfaðir Sturlunga, Sturla Þórðarson (1115-1183) bjó í Hvammi. Hann var 9. ættliður frá Auði djúpúðgu. Þar fæddust synir hans Þórður, Sighvatur og Snorri.

Árni Magnússon prófessor og handritasafnari (1663-1730) ólst upp í Hvammi. Prestar voru löngum þaulsætnir í Hvammi. Frá því um siðaskipta til 1944 sátu staðinn aðeins 15 prestar.

Hvanneyri

Hvanneyri er stórbýli frá landnámstíma. Fyrstur ábúanda þar er talinn hafa verið Grímur háleyski en Hvanneyri er hluti af landnámsjörð Egils Skallagrímssonar.

Landbúnaðarskóli Íslands á Hvanneyri er reistur á gömlum grunni öflugrar rannsóknarstofnunar og tveggja gróinna menntastofnana á landbúnaðarsviði, Rannsóknarstofnunar landbúnaðarins, Landbúnaðarháskólans á Hvanneyri og Garðyrkjuskóla ríkisins. Landbúnaðarháskólinn tók til starfa í upphafi árs 2005. Skólahald á sér annars langa sögu á Hvanneyri en búnaðarskóli var stofnaður þar 1889 og 1947 var stofnuð 1947. Aðalmiðstöð Landbúnaðarháskóla Íslands er á Hvanneyri. Megin viðfangsefni hans er nýting og verndun náttúruauðlinda á landi og bæði er boðið upp á háskólanám og starfsmenntanám.

Á staðnum er rekið eina Landbúnaðarsafn landsins auk þess sem þar má finna Ullarselið sem er einaf betri verslun landsins með ullar- og handverksvörur.

Í kringum Hvanneyri er verndarsvæði blesgæsar sem hefur viðkomu á túnum staðarins bæði vor og haust.

Ingjaldshóll

Ingjaldshóll var höfuðból og höfðingjasetur í margar aldir og kemur við sögu í Víglundarsögu og Bárðar sögu Snæfellsáss.

Þar varð snemma kirkjustaður og lögskipaður þingstaður og þá um leið aftökustaður sakamanna.

Kirkjan á Ingjaldshóli er elsta steinsteypta kirkja heims sem var reist 1903.

Jörfi

Á Jörfa stóð hin alræmda gleðisamkoma á hverju hausti á 17 öld. Hún var endanlega bönnuð árið 1708.

Krosshólaborg

Landnámskonan Auður djúpúðga nam land í Dalasýslu og reisti bæinn Hvamm.

Hún var kristin og segir sagan að hún hafi reist kross á Krosshólaborg og farið þangað til að biðja.

Kvenfélagskonur í Dölum reistu minnisvarða, steinkross um Auði djúpuðgu árið 1965. Við það tækifæri var útimessa við krossinn og mættu 600 manns.

Sumarið 2008 var sett upp söguskilti á staðnum.

Krosslaug

Krosslaug, eða Reykjalaug, er í landi Reykja í Lundarreykjadal. Laugin er um 42°C heit og er hún friðlýst. Sagan segir að þegar kristni var lögtekin árið 1000 hafi vestanmönnum ekki litist á að vera skírðir upp úr köldu vatni á Þingvöllum og því látið skíra sig í Krosslaug í staðinn.

Laugar í Sælingsdal

Guðrún Ósvífursdóttir ein af aðalsöguhetjum Laxdælu er fædd og uppalin að Laugum.

Á Laugum er jarðhiti og var borað eftir heitu vatni 1964-1965. Öll hús á staðnum eru hituð upp með heitu vatni.

Yfirbyggð sundlaug byggð þar 1932.

Nálægt Laugum er álfaborgin Tungustapi.

Gljúfrasteinn

Gljúfrasteinn var heimili og vinnustaður nóbelskáldsins Halldórs Laxness og fjölskyldu hans um hálfrar aldar skeið.

Húsið sem reist var 1945 er gott dæmi um íslenskt menningarheimili á tuttugustu öld og er því haldið óbreyttu frá því skáldið bjó þar.

Þar er nú safn með lifandi hljóðleiðsögn á nokkrum tungumálum. Í móttökuhúsi er minjagripaverslun og margmiðlunarsýning.

Tilvalinn áningastaður á leiðinni vestur á land eða á leiðinni til Þingvalla.

Á sumrin eru tónleikar í stofunni alla sunnudaga. Rithöfundar lesa úr sínum verkum fyrir jólin.

Viti - Akranesviti

Fyrsti vísir að vita á Akranesi var ljósker á Teigakotslóð sem kveikt var á árið 1891.

Árið 1918 var byggður steinsteyptur viti yst á Syðriflös á Akranesi eftir teikningu Thorvalds Krabbe verkfræðings. Ljóshúsið var smíðað úr járnplötum úr Goðafossi sem strandaði undir Straumnesfjalli árið áður.

Vitinn stendur enn þó hann hafi ekki verið notaður frá 1947. Hann er er tíu metra hár og er opinn almenningi en frábært útsýni er efst úr vitanum.

Árin 1943 - 1944 var reistur nýr 19,2 metra hár viti eftir teikningu Axels Sveinssonar verkfræðings. Efst á vitanum er efnismikið steinsteypt handrið með rimlum. Hægt er að komast upp í vitann og er stórkostlegt útsýni úr honum til allra átta. Hljómburður í Akranesvita þykir einstaklega góður og hafa verið haldnar tónlistaruppákomur þar inni en þar eru fjögur steinsteypt milligólf og stigar milli hæða.

Upplýsingar fengnar úr Vitar á Íslandi, útgefandi Siglingastofnun Íslands árið 2002.

Viti - Arnarstapaviti

Árið 1941 var byggður viti á Arnarstapa eftir teikningu Axels Sveinssonar verkfræðings.

Vitinn er steinsteyptur 3ja m hár ílangur ferhyrningur, 2 x 4 m að grunnfleti með innbyggðu ljósi. Framgafl vitans er með afsniðin horn. Tvö bandanna voru innfelld og í upphafi voru þau húðuð með hrafntinnu en hin þrjú með ljósu kvarsi. Árið 1991 var vitinn kústaður með hvítu sementi.

Innsiglingavitarnir í Grundarfirði og Ólafsvík eru byggðir eftir sömu teikningu.

Upplýsingar fengnar úr bókinni Vitar á Íslandi sem Siglingastofnun Íslands gaf út árið 2002.

Viti - Elliðaeyjarviti

Árið 1902 var fyrst reistur viti í Elliðaey. Danski vitamálastjórinn Ravn teiknaði þann vita en samstarfsmaður hans Brinch vitaverkfræðingur hafði skoðað aðstæður í Elliðaey árið 1897.

Vitinn var lítið timburhús á steinhlöðnum grunni 1,6 x 1,9 m að grunnfleti. Vitinn reyndist ekki nógu vel og því var byggður nýr viti árið 1905. Sá reyndist ekki heldur fullnægjandi og því var enn á ný ráðist í vitabyggingu árið 1921. Reistur var 10 m hár járngrindarviti og sett á hann ljóshúss smíðað á járnsmíðaverkstæði ríkisins.

Árið 1951 var síðan byggður steinsteyptur 8 m hár viti í Elliðaey sem Axel Sveinsson verkfræðingur teiknaði.

Vitinn er þrístrendur að grunni sem er mjög fátítt á Íslandi. Aðeins einn annar viti á landinu er af sama formi það er Stokksnesviti, sem Ágúst Pálsson arkitekt teiknaði.

Íbúðarhús, fjárhús, fjós og hlaða voru byggð í Elliðey fyrir vitavörð en föst búseta lagðist þar síðan af árið 1964.

Upplýsingar eru fengnar úr bókinni Vitar á Íslandi, útgefandi Siglingastofnun Íslands, árið 2002.

Viti - Höskuldseyjarviti

Árið 1926 voru reistir þrír samskonar vitar við Breiðafjörð; Krossnesviti, Klofningsviti og vitinn í Höskuldsey.

Vitinn í Höskuldsey var talinn of lágreistur og því ekki koma að fullum notum. Hann var því rifinn árið 1948 og nýr viti reistur eftir teikningu Axels Sveinssonar, verkfræðings.

Vitinn er steinsteyptur ferstrendur turn, 10,6 m hár.

Íbúðarhús var byggt í Höskuldsey árið 1929 fyrir vitavörð. Benedikt Jónasson teiknaði húsið og síðan fjós og hlöðu og seinna bættist fjárhús við. Íbúðarhúsið brann í desmber 1961 og þá lagðist föst búseta af í Höskuldsey.

Upplýsingar eru fengnar úr bókinni Vitar á Íslandi sem Siglingastofnun Íslands gaf út árið 2002.

Viti - Hvaleyrarviti

Árið 1948 var reistur viti á Hvaleyri í Hvalfirði.

Vitinn er áttstrent ljóshúss úr járnsteypu á steinsetyptum sökkli 3ja m hár. Hönnuður er S.H: &Co í Kristjaníu í Noregi.

Hólmavíkurviti sem reistur var 1914 er sömu gerðar og Hvaleyrarviti.

Aðgegngi að vitanum er frekar torvelt.

Upplýsingar fengnar úr VItar á Íslandi, útgefandi Siglingastofnun Íslands árið 2002.

Viti - Kirkjuhólsviti

Árið 1952 var reistur steinsteyptur viti á Kirkjubólshóli i staðarsveit á sunnanverðu Snæfellansi.

Vitinn er hannaður af Axeli Sveinssyni verkfræðingi og Einari Stefánssyni húsateiknara.

Vitinn hefur tvær megin formgerðir, annars vegar hátt hvasshyrnt turnform og hins vegar bogformaða framhlið.

Kirkjuhólsviti er byggður eftir sömu teikningu og Bjargtangaviti.

Upplýsingar eru fengnar úr bókinni Vitar á Íslandi sem Siglingastofnun Íslands gaf út árið 2002.

Viti - Klofningsviti

Klofningsviti var reistur árið 1926 sama ár og eftir sömu teikningu og Krossnesviti og Höskuldseyjarviti, sem var reyndar síðan rifinn árið 1948 og byggður nýr.

Klofningsviti er 9,3 m hár steinsteyptur turn, teiknaður af Benedikt Jónassyni verkfræðingi. Anddyri var byggt við vitann 1931. Steinsteypt handriði var brotið af vitanum og einfalt opið handriði sett í staðinn.

Upplýsingar eru fengnar úr bókinni Vitar á Íslandi, útgefandi Siglingastofnun Íslands, árið 2002.

Viti - Krossnesviti

Krossnesviti var reistur árið 1926 eftir teikningu Benedikts Jónassonar verkfræðings.

Þrír vitar voru reistir við Breiðafjörð árið 1926, allir eftir sömu teikningu. Vitarnir eru Krossnesviti, Klofningsviti og Höskuldseyjarviti, sem var síðan rifinn árið 1948 og nýr viti reistur eftir annarri teikningu.

Krossnesviti er steinsteyptur ferstrendur turn 9,3 m hár. Anddyri var byggt við vitann árið 1931.

Erfitt aðgengi er að vitanum, sem stendur vestast við mynni Grundarfjarðar.

Upplýsingar eru fengnar úr bókinni Vitar á Íslandi, útgefandi Siglingastofnun Íslands, árið 2002.

Viti - Krossvíkurviti

Krossvíkurviti var reistur árið 1937. Vitinn er ferstrent steinsteypt hús, 3 m á hæð með viðbyggðu anddyri. Svalir eru yfir anddyri og hluta hliðarveggja.

Benedikt Jónasson verkfræðingur teiknaði innsiglingarvita fyrir Akraneshöfn 1934 en Axel Sveinsson verkfræðingur breytti lítillega út frá uppphaflegri teikningu þegar vitinn var reistur

Krossvíkurviti var lagður niður sem hafnarviti árið 1986 og breytt í fremra leiðarljós sem markar innsiglinguna inn í höfnina og er leiðarljósið ofan á vitanum.

Axel Sveinsson gerði tillögu að nýjum innsiglingarvita fyrir Akranes árið 1955 ekkert varð að þeim áformum en í staðinn var byggður turn eftir þeirri teikningu að Görðum á Akranesi.

Upplýsingar fengnar úr bókinni Vitar á Íslandi, útgefandi Siglingastofnun Íslands árið 2002.

Viti - Malarrifsviti

Árið 1917 var reistur 20 m hár járngrindarviti yst á Malarrifi, nálægt Lóndröngum á Snæfellsnesi.

Árið 1946 var byggður nýr steinsteyptur viti í stað járngrindarvitans. Vitinn er 20,2 m hár sívalur turn. Fjórir stoðveggir eru upp með turninum. Í vitanum eru fimm steinsteypt milligólf með tréstiga milli hæða. Ágúst Pálsson arkitekt hannaði vitann.

Íbúðarhús fyrir vitavörð var reist við Malarrifsvita árið 1948 en Starfsmannafélag Siglingastofnunar Íslands fékk húsið til afnota árið 1999.

Malarrifsviti var friðaður árið 2003 ásamt sex örðum vitum þegar haldið var upp á að 125 ár voru frá því að fyrsti vitinn var reistur.

Upplýsingar eru meðal annars fengnar úr Vitar á Íslandi, útgefandi Siglingastofnun Íslands árið 2002.

Viti - Ólafsvíkurviti

Ólafsvíkurviti var reistur árið 1943 eftir teikningu Axels Sveinssonar, verkfræðings.

Vitinn er sömu gerðar og Arnarstapaviti og Grundarfjarðarviti sem reyndar er búið að afleggja.

Vitinn er 3 m hár, steinsteyptur ílangur ferhyrningur 2 x 4 m að grunnfleti með innbyggt ljóshúss.

Upplýsingar eru fengnar úr bókinni Vitar á Íslandi, útgefandi er Siglingastofnun Íslands árið 2002.

Viti - Öndverðarnesviti

Árið 1909 var fyrsti vitinn reistur á Öndverðarnesi. Vitinn var stólpaviti en árið 1914 var reist 2,5 metra há timburklædd járngrind með 2,4 m háu áttstrendu ljóshúsi.

Steinsteyptur viti var síðan byggður að Öndverðarnesi árið 1973. Vitinn er ferstrendur 3,5 metra hár með 3 m háu áttstrendu ljóshúsi. Vitinn er sömu gerðar og Surtseyjarviti sem reistur var sama ár. Aðalsteinn Júlíusson verkfræðingur hannaði vitann.

Upplýsingar eru fengnar úr bókinni Vitar á Íslandi, útgefandi Siglingastofnun Íslands, 2002.

Viti - Rauðanesviti

Rauðanesviti var tekinn í notkun árið 1940.

Axel Sveinsson, verkfræðingur hannaði vitann sem er sexstrendur 2,4 m í þvermál, steinsteyptur með steyptu þaki. Vitinn er 3,5 m hár.

Erfitt aðgengi er að vitanum.

Upplýsingar fengnar úr bókinni VItar á Íslandi, útgefandi Siglingastofnun Íslands, árið 2002.

Viti - Súgandiseyjarviti

Árið 1948 var ljóshúsi sem áður hafði verð notað á Gróttuvita komið fyrir á steinsteyptri plötu í Súgindisey við Stykkishólm. Ljóshúsið er frá 1897 teiknað af dönsku vitamálastofnuninni.

Ljóshúsið er elsta vitamannvirkið sem starfrækt er hér á landi, þó svo að það hafi ekki alltaf staðið á sama stað.

Upplýsingar eru fengnar úr bókinni Vitar á Íslandi sem Siglingastofnun Íslands gaf út árið 2002

Viti - Svörtuloftaviti

Árið 1914 var reistur 10 m hár járngrindarviti með 2,3, m ljóshúsi yst á Skálasnaga á Svörtuloftum vestast á Snæfellsnesi. Thorvald Krabbe teiknaði mannvirkið.

Vitinn entist í 17 ár þá var hann orðinn mjög ryðbrunninn og þótti ekki lengur treystandi.

Árið 1931 var tekinn í notkun nýr viti sá var steinsteyptur, ferstrendur 9,5 m hár. Benedikt Jónsson verkfræðingur hannaði vitann.

Upplýsingar eru fengnar úr bókinni Vitar á Íslandi, útgefandi er Siglingastofnun Íslands árið 2002.

Viti - Þjófaklettaviti

Þjófaklettaviti var reistur árið 1987. Hann er hannaður af Sænsku vitamálastofnuninni.

Vitinn er sívalur 3 m hár úr trefjaplasti en stendur á eins metra hárri undirstöðu.

Aðgengi að vitanum er mjög erfitt.

Upplýsingar eru fengnar úr bókinni Vitar á Íslandi sem Siglingastofnun Íslands gaf út árið 2002.

Viti - Þormóðsskersviti

Þormóðssker er 200 m á lengd og 100 m á breidd en aðeins 11 m hátt. Viti var reistur á skerinu á árunum 1941 - 1942 hann er 19,2 m hár auk 3,1 m ljóshúss. Vitinn var ekki tekinn í notkun fyrr en 1947.

Franska hafrannsóknarskipið Pourqui Pas ? fórst í skerjaklasanum undir Mýrum í september 1936 og varð það til þess að hugað var að því að reisa þar vita.

Guðjón Samúelsson húsameistari ríkisins teiknaði tillögu að vitabyggingu í desember 1936. Axel Sveinsson verkfræðingur breytti aðeins út frá teikningu Guðjóns og var vitinn reistur samkvæmt þeirri breytingu.

Kálfshamarsviti á Skagaströnd sem reistur var 1940 er samskonar bygging og Þormóðsskersviti nema hvað sökkullinn er aðeins frábrugðinn.

Árið 1952 var afhjúpað minnismerki inni í vitanum eftir Ríkharð Jónsson, myndhöggvara um þá sem fórust með Pourqui Pas ?.

Upplýsingar eru fengnar úr bókinni Vitar á Íslandi, útgefandi er Siglingastofnun Íslands árið 2002.

Viti - Töskuviti

Töskuviti var reistur árið 1981. Vitinn er 12 m há stálsúla sem stendur á steyptri undirstöðu fyrir utan hafnarmynnið á Rifi.

Vitinn er með sérstöðu meðal íslenskra vita þar sem hann stendur úti í sjó og undirstaðan að mestu undir yfirborði sjávar.

Steingrímur Arason verkfræðingur hannaði vitann.

Upplýsingar eru fengnar úr bókinni Vitar á Íslandi, útgefandi er Siglingastofnun Íslands árið 2002.

Reykholt í Borgarfirði

Reykholt er einn merkasti sögustaður landsins. Frægast er Reykholt vegna búsetu Snorra Sturlusonar 1206-1241.

Í Reykholti er forn laug Snorralaug þar sem Snorri er talin hafa setið og hvílt sig frá skriftum.

Snorrastofa í Reykholti býður upp á sýningar, leiðsögn og fyrirlestra. Öflugt tónlistarlíf er í Reykholtskirkju. Sígild tónlist í sögulegu umhverfi - Reykholtshátíð er tónlistarhátíð sem haldin er í lok júlí ár hvert.

Nánari upplýsingar á heimasíðu Reykholts www.snorrastofa.is


Eitt hótel er í Reykholti sjá frekari upplýsingar hér.

Skallagrímsgarður

Í hjarta Borgarness er þessi skrúðgarður sem er ein af perlum bæjarins. Þar er einn merkasti sögustaður Egilssögu en þar er Skallagrímur og Böðvar sonarsonur hans heygðir. Í dag er unaður að fara í sund í sundlaug bæjarins og slappa af í kyrrð og fegurð Skallagrímsgarðs á eftir, eða stoppa þar með nesti.

Skarð

Skarð er bær og kirkjustaður á Skarðströnd. Hafa margar söguhetjur Íslendingasagnanna búið þar.

Einn af stórbændum þeim sem búið hafa á Skarði er Björn hirðstjóri Þorleifsson og kona hans Ólöf ríka Loftsdóttir. "Eigi skal gráta Björn bónda heldur safna liði" er haft eftir Ólöfu eftir að Englendingar höfðu vegið mann hennar árið 1467.

Skarðskirkja var lengi vel höfuðkirkjan í Skarðsþingum. Núverandi kirkja var endurbyggð 1914-1916. Í Skarðskirkju er margt um stórmerka gripi. Sem dæmi má nefna alabasturmyndir frá 15 öld og prédikunarstólinn sem er frá 17 öld.

Sönghellir

Sönghellirinn er norðan við Stapafell. Kunnur fyrir bergmál sitt,

Staðastaður

Staðastaður er prestsetur og þar var prestur Ari fróði árin 1076-1148. Hann er þekktur fyrir ritun sína á Íslendingabók, sem er elsta og eitt merkasta sagnfræðirit Íslendingasögunnar. Minnisvarði um Ara fróða eftir Ragnar Kjartansson stendur skammt frá kirkjunni.Núverandi kirkja er steinsteypt reist á árunum 1942- 1945.

Sögusviðið í Kristnihaldi undir Jökli eftir Halldór Kiljan Laxness er að nokkru leiti komið til á Staðastað.

Staupasteinn

Staupasteinn er bikarlaga steinn við gamla þjóðveginn um Hvalfjörð skammt frá Hvammsvík. Vinsæll áningastaður ferðamanna hér áður fyrr vegna fagurs útsýnis.

Steininn var friðlýstur 1974. Staupasteinn er einnig þekktur undir nöfnunum: Prestasteinn, Steðji og Karlinn í Skeiðhóli.

Einbúinn Staupa-Steinn skaut upp kollinum í kynningarstarfi vegna Hvalfjarðarganga vorið 1997 og prýddi þá m.a. boli þátttakenda í víðavangshlaupi sem Spölur styrkti á Akranesi og límmiða til að setja á bílrúður. Þessi geðþekki, síðhærði og skeggjaði karl Staupa-Steinn er fáum sýnilegur. Hann er kenndur við bústað sinn, Staupastein, og unir sér vel á þeim slóðum.

Erla Stefánsdóttir sjáandi hefur oft staldrað við hjá Staupa-Steini á leið sinni fyrir Hvalfjörð og lýsir honum sem góðlyndum, gamansömum og sérlega barngóðum. Best skemmtir hann sér þegar fjölskyldufólk staldrar við nálægt Staupasteini og krakkar leika sér með bolta á meðan foreldrar njóta útilofts og náttúrufegurðar. Staupa-Steinn veit nefnilega ekkert skemmtilegra en atast í boltaleikjum með krökkum.

Tröllafossar

Fossa- og flúðasvæði í Grímsá. Óvenjufallegt útsýni og sjónarhorn á fjallatindinn, Skessuhorn. Á sumrin er algengt að sjá laxa stökkva upp fossana.

Í klettum við árbakkann er afar skýr tröllkonumynd.

Tröllagaður er í Fossatúni þar sem hægt er að fara í tröllaleiki og gömguferð þar sem hægt er að kynnast perósnunum úr sögunni Tryggðatröll eftir Steinar Berg.

Hvalfjörður

Hvalfjörðurinn er 30 m km langur og 84 m djúpur þar sem hann er dýpstur.

Í seinni heimstyrjöldinni á árunum 1940-1945 var flotastöð bandamanna innst í Hvalfirði þar sem Hvalstöðin er. Þar var skipalægi og viðkomustaður skipalesta á leið milli Bandaríkjanna og Rússlands oft á tíðum var fjöðurinn fullur af skipum. Bækistöðvar voru reistar í landi Litlasands og Miðsands. Enn má sjá minjar frá stríðsárunum og eru þar meðal annars braggar sem hafa verið gerðir upp.

Hótel Glymur býður upp á hernámsára söguferð um Hvalfjörðinn.

Vesturland

Þéttbýli
Þéttbýlisstaðirnir á Vesturlandi eru eins fjölbreyttir og þeir eru margir. Alls eru 10 staðir með fleiri en 50 íbúa og er Akranes fjölmennasti þéttbýliskjarninn með rúmlega 6.600 íbúa.

Öll stærri bæjarfélögin leggja æ ríkari áherslu á öfluga ferðaþjónustu þar sem fjölbreytt afþreying og þjónusta er í boði. 

Bæir og þorp

Map Hellissandur, Rif Grundarfjörður Stykkishólmur Búðardalur Dalir Arnarstapi Hellnar Snæfellsnes Bifröst Húsafell Reykholt Borgarfjörður Hvanneyri Borgarnes Hvalfjörður Akranes Ólafsvík Bjarteyjarsandur