Staða ferðamála

Gögn, rannsóknir og greiningar

Staða ferðamála

Til að geta tekið upplýstar ákvarðanir um þróun Vesturlands sem áfangastaðar þurfum við að þekkja stöðu ferðamála í landshlutanum og fylgjast með því hvernig þau þróast.

Hér tökum við saman tölulegar upplýsingar, rannsóknir og greiningar sem varpa ljósi á umfang og þróun ferðaþjónustu, ferðavenjur gesta og áhrif ferðamála á samfélag og atvinnulíf Vesturlands.

Þessi þekking nýtist öllum sem koma að ferðamálum á Vesturlandi við stefnumótun, áætlanagerð og ákvarðanir um verkefni og áherslur til framtíðar.

Ferðaþjónustan í tölum

Lykiltölur og þróun ferðamála

Lykiltölurnar gefa yfirsýn yfir nokkra mikilvæga þætti ferðamála á Vesturlandi, svo sem heimsóknir og gistinætur gesta, gistirými og atvinnu í ferðaþjónustu.

Tölurnar byggja á gögnum frá ólíkum heimildum og mæla því ekki allar það sama. Mikilvægt er að þekkja hvað liggur að baki hverri tölu til að geta túlkað hana rétt.

Hér fyrir neðan má opna hverja lykiltölu og lesa nánari skýringar ásamt upplýsingum um uppruna gagnanna.

Viðmiðunarár

2025

Smelltu á lykiltölu til að sjá skýringar og heimildir.

50% Erlendir gestir sem heimsóttu Vesturland

Samkvæmt brottfararkönnun Ferðamálastofu er áætlað að helmingur erlendra gesta sem komu til Íslands árið 2025 hafi heimsótt Vesturland á ferð sinni um landið, hvort sem þeir gistu þar eða ekki. Niðurstaðan byggist á svörum ferðafólks í könnun sem eru vegin með hliðsjón af heildarfjölda erlendra gesta til Íslands, en ekki á beinum talningum ferðafólks á Vesturlandi.

Heimild: Ferðamálastofa, brottfararkönnun erlendra gesta 2025.

31% Erlendir gestir sem gistu á Vesturlandi

Samkvæmt brottfararkönnun Ferðamálastofu er áætlað að 31% erlendra gesta sem komu til Íslands árið 2025 hafi gist á Vesturlandi. Hlutfallið byggist á svörum ferðafólks í könnun, vegnum með hliðsjón af heildarfjölda erlendra gesta til Íslands. Það sýnir áætlað hlutfall gesta sem gistu á svæðinu, en ekki fjölda skráðra gistinátta.

Heimild: Ferðamálastofa, brottfararkönnun erlendra gesta 2025.

677.505 Skráðar gistinætur

Árið 2025 voru skráðar 677.505 gistinætur á Vesturlandi. Ein gistinótt er ein nótt sem einn gestur dvelur á gististað. Talan byggist á gögnum sem gististaðir skila til Hagstofu Íslands og nær því ekki endilega til allra gistinátta á svæðinu.

Heimild: Hagstofa Íslands, gistinætur eftir landshlutum 2025.

1.262 Skráð hótel- og gistiheimilisherbergi

Á háönn árið 2025 voru 1.262 hótel- og gistiheimilisherbergi skráð á Vesturlandi. Talan sýnir fjölda skráðra herbergja á þessum tegundum gististaða, en nær ekki til alls gistiframboðs, svo sem sumarhúsa og annarrar gistingar.

Heimild: Hagstofa Íslands, gistirými eftir landshlutum 2025.

9,6% Hlutfall ferðaþjónustu í atvinnu

Árið 2025 tengdust 9,6% launþega með búsetu á Vesturlandi ferðaþjónustu. Hlutfallið byggist á upplýsingum um einstaklinga sem fengu launagreiðslur frá fyrirtækjum í ferðaþjónustu og sýnir þannig mikilvægi atvinnugreinarinnar fyrir atvinnu íbúa svæðisins.

Heimild: Hagstofa Íslands. Úrvinnsla: Vífill Karlsson, SSV (2026).

Mikilvægt við túlkun talna

Tölur um heimsóknir og hlutfall erlendra gesta byggja á úrtakskönnunum og eru áætlaðar stærðir. Upplýsingar um gistinætur og gistirými byggja hins vegar á skráðum gögnum. Því þarf að hafa í huga að mælikvarðarnir lýsa ólíkum þáttum ferðaþjónustunnar og eru ekki beint samanburðarhæfir.