Framtíðarsýn Vesturlands
Vesturland er eftirsóttur áfangastaður fyrir íbúa og gesti – til að dvelja og njóta.
Ferðaþjónusta á Vesturlandi byggir á sjálfbærni, ábyrgri nýtingu auðlinda og góðu samstarfi. Náttúra, saga, menning og matarauður móta sterka sérstöðu Vesturlands og skapa fjölbreytt tækifæri til gæðaþjónustu og upplifunar.
Vandað skipulag og uppbygging áningarstaða og útivistarsvæða stuðlar að góðri upplifun, öryggi fólks og náttúruvernd. Góðar samgöngur og grunnþjónusta, ásamt vandaðri upplýsingagjöf og leiðsögn, skapa góðar aðstæður fyrir íbúa og gesti sem velja Vesturland til að dvelja og njóta.
Áfangastaðaáætlun – tilgangur og markmið
Hvað er Áfangastaðaáætlun Vesturlands?
Áfangastaðaáætlun Vesturlands er sameiginleg stefna um þróun ferðamála í landshlutanum. Hún er unnin í samstarfi við sveitarfélög, íbúa og aðra hagaðila og hefur það að markmiði að stuðla að sjálfbærri þróun áfangastaðarins Vesturlands.
Áætlunin byggir á greiningu á stöðu og sérstöðu landshlutans og setur fram sameiginlega framtíðarsýn, meginmarkmið og áherslur um þróun ferðamála, skipulag og uppbyggingu innviða.
Áfangastaðaáætlunin er birt á þessum vef og uppfærð eftir því sem nýjar upplýsingar, áherslur og verkefni liggja fyrir.
