Uppbygging

Í Áfangastaðaáætlun Vesturlands er haldið utan um hugmyndir að uppbyggingarverkefnum sem hafa komið fram í samráði við hagaðila ferðamála, meðal annars á opnum vinnustofum við mótun áætlunarinnar eða beiðni einstaka landeiganda. Verkefnin endurspegla þarfir og vilja til að bæta aðstöðu, aðgengi, öryggi og upplifun á áningarstöðum, útivistarsvæðum og öðrum stöðum sem hafa þýðingu fyrir gæði og upplifun á áfangastaðnum Vesturlandi.

Áður en verkefni er sett á uppbyggingarlista áfangastaðaáætlunar er það kynnt fyrir viðkomandi sveitarfélagi sem staðfestir fyrir sitt leyti að fyrirhuguð uppbygging samræmist skipulagsstefnu sveitarfélagsins og samþykkir að verkefnið verði birt í Áfangastaðaáætlun Vesturlands. Listinn nær til þeirra sveitarfélaga sem eiga samstarf við Markaðsstofu Vesturlands – áfangastaðastofu – um ferðamál í landshlutanum.

Skráning verkefnis á uppbyggingarlistann felur hvorki í sér ákvörðun um framkvæmdir né skuldbindingu um að ráðast í þær. Verkefnin eru á mismunandi undirbúningsstigum og kunna jafnvel að vera enn á hugmyndastigi. Til að þau komist til framkvæmda þurfa aðstandendur þeirra að vinna að frekari undirbúningi, svo sem skipulagsmálum, hönnun, leyfisveitingum og fjármögnun.

Verkefnin geta verið á vegum sveitarfélaga, landeigenda, félagasamtaka eða einkaaðila. Hvert verkefni er kynnt með stuttri lýsingu, framtíðarsýn og samræmdu mati á tilgangi þess og helstu áherslum.

Uppbyggingarlistinn er því yfirlit yfir hugmyndir og þarfir fyrir uppbyggingu innviða sem hafa hlotið samþykki viðkomandi sveitarfélaga til birtingar í áætluninni, en er ekki forgangsröðuð framkvæmdaáætlun. Tilgangurinn er að stuðla að uppbyggingu innviða sem bæta aðstöðu, öryggi og upplifun íbúa og gesta og styrkja Vesturland sem eftirsóknarverðan áfangastað til að dvelja og njóta.