Fyrir þá sem stunda skíði eða snjóbretti eru mörg góð skíðasvæði um allt land sem opin eru yfir vetrartímann ef aðstæður leyfa.
Skíðasvæðið í Grundarfirði er staðsett í brekkunum fyrir ofan Grunnskóla Grundarfjarðar og hefur verið mikilvægur hluti af útivistarlífi bæjarins um áratugaskeið. Á níunda áratugnum réðst áhugafólk innan Ungmennafélags Grundarfjarðar í uppbyggingu svæðisins með því að setja upp 600 metra toglyftu, byggja skíðakofa og kaupa snjótroðara.
Á síðari árum hefur yngri kynslóðin tekið við keflinu og staðið að endurnýjun búnaðar, viðgerðum og uppbyggingu skíðaskálans með öflugum stuðningi íbúa í Grundarfirði og víðar á Snæfellsnesi.
Brekkurnar eru enn þær sömu og hafa löngum verið vinsælar meðal skíðafólks. Stutt er að fara úr bænum upp í brekkur og ekki síður þægilegt að renna sér aftur heim eftir góðan dag á skíðunum.
