Vesturland fær tvo styrki úr Framkvæmdasjóði ferðamannastaða

Tvö metnaðarfull verkefni á Vesturlandi hafa hlotið styrk úr Framkvæmdasjóði ferðamannastaða fyrir árið 2026. Alls var úthlutað til 18 verkefna um land allt og nemur heildarfjárhæð styrkja tæpum 490 milljónum króna. Að þessu sinni var sérstök áhersla lögð á öryggi ferðamanna og endurspeglast það í þeim verkefnum sem fengu úthlutun.

07.05.2026

Glymur í Hvalfirði – 26,45 milljónir króna

Verkefnið snýr að áframhaldandi vernd og uppbyggingu á svæðinu við Glym, næst hæsta foss Íslands. Áhersla er lögð á stígagerð og betri stýringu gesta, meðal annars um Svartahrygg og austan gilsins. Þá verður bætt við öryggisbúnaði við efra vað yfir Botnsá, hættulegum leiðum lokað betur og stafrænar leiðbeiningar þróaðar. Markmiðið er skýrt: að draga úr slysahættu og vernda viðkvæma náttúru svæðisins.

Súgandisey í Stykkishólmi – 35 milljónir króna

Uppbygging heldur áfram í Súgandisey þar sem unnið er að verkefninu Fjöregginu – nýju kennileiti fyrir Stykkishólm. Um er að ræða útsýnisskúlptúr og áningarstað sem býður upp á stórbrotið útsýni yfir Breiðafjörð og eyjarnar. Verkefnið er hannað með bæði upplifun og öryggi í huga, þar sem skýr leiðarstýring, handrið og aðrir öryggisþættir tryggja betra aðgengi og aukið öryggi gesta við bjargbrúnina.

(Ljósm. Stykkishólmur.is)

Með þessum styrkjum er stigið mikilvægt skref í átt að betri aðstöðu, auknu öryggi og sjálfbærari ferðaþjónustu á Vesturlandi.

Þessi verkefni eru bæði á framkvæmdalista áfangastaðaáætlunar Vesturlands og falla vel að áherslum um náttúruvernd og aukið öryggi á fjölsóttum áningarstöðum.