Íslenskar geitur

Íslenska geitin er eitt fágætasta húsdýr Íslands og á rætur sínar að rekja allt aftur til landnáms. Stofninn hefur verið einangraður í meira en þúsund ár án þekktrar innblöndunar frá erlendum geitakynjum og telst því einstakur hluti af íslenskum erfða- og menningararfi.

Um langt skeið var íslenska geitin í útrýmingarhættu og fór stofnstærðin tvívegis niður fyrir 100 dýr. Með markvissum verndaraðgerðum og ræktunarstarfi hefur stofninn hins vegar eflst á ný og telur í dag um 1.700 dýr.

Á Vesturlandi, að Háafelli í Hvítársíðu, er rekið Geitfjársetur Íslands þar sem unnið er að ræktun íslensku geitarinnar, þróun afurða og miðlun fræðslu um sögu og mikilvægi stofnsins. Gestir geta þar kynnst þessu einstaka landnámsbúfé og hlutverki þess í íslenskri búskapar- og menningarsögu.

Íslenska geitin er lifandi tákn um mikilvægi verndunar íslenskra búfjárstofna og einstakan náttúru- og menningararf landsins.