Samráðsvettvangur um sólmyrkva

Almyrkvi á sólu mun ganga yfir Vesturland 12. ágúst 2026. Um er að ræða sjaldgæfan náttúruatburð sem vekur mikla athygli bæði innanlands og erlendis, því má gera ráð fyrir aukinni aðsókn gesta á svæðið. Þó óvissa ríki um veður, ferðamynstur og fjölda gesta benda fyrirliggjandi upplýsingar til þess að verulegt álag geti skapast á vegakerfi, þjónustu, fjarskipti og innviði á Vesturlandi, sérstaklega á sólmyrkvadaginn, en líka dagana í kringum atburðinn.

Samráðsvettvangur Vesturlands vegna sólmyrkva hefur verið stofnaður til að samræma undirbúning, upplýsingagjöf og samstarf milli sveitarfélaga, stofnana og annarra hagaðila. Markmið hans er að skapa sameiginlega yfirsýn yfir stöðu mála, tryggja samhæfingu aðgerða og miðla samræmdum upplýsingum um aðgengi, aðstöðu og aðstæður á Vesturlandi í aðdraganda almyrkvans.

Markaðsstofa Vesturlands – áfangastaðastofa leiðir samráðsvettvanginn og heldur utan um fundi, upplýsingamiðlun og yfirsýn yfir stöðu mála. Undirbúningur og framkvæmd aðgerða er hins vegar á ábyrgð þeirra aðila sem fara með viðkomandi málaflokka, þar á meðal sveitarfélaga, viðbragðsaðila og annarra stofnana.

Mikilvægt er að öll sveitarfélög á Vesturlandi séu virkir þátttakendur í undirbúningi og samráði, skilgreini ábyrgð og verkþætti innan sinnar stjórnsýslu og vinni markvisst með samráðsvettvangnum. Undirbúningur og aðgerðir fyrir svona viðamikinn atburð verða aldrei traustari en veikasti hlekkurinn í samstarfinu. Til að tryggja sem besta niðurstöðu fyrir íbúa, gesti og starfsemi á svæðinu þarf samhæfða vinnu allra sveitarfélaga og hagaðila á Vesturlandi.

Starfsmenn samráðshóps

Viðburðir á Vesturlandi 12. ágúst