Mótvindur í ferðaþjónustu ræddur á fjölmennum fundi í Borgarnesi

Á fundinum var sjónum beint að rekstrarumhverfi ferðaþjónustunnar í ljósi efnahagsaðstæðna og fyrirhugaðra breytinga á sköttum og gjöldum sem nú liggja fyrir Alþingi. Rætt var um möguleg áhrif breytinganna á alþjóðlega samkeppnishæfni íslenskrar ferðaþjónustu, rekstur fyrirtækja, fjárfestingar, atvinnusköpun og byggðaþróun.

Frummælendur fundarins fjölluðu um ólíkar hliðar ferðaþjónustunnar, meðal annars hlutverk greinarinnar í verðmætasköpun, áhrif skattabreytinga, mikilvægi skemmtiferðaskipa fyrir landsbyggðina og horfur fyrir fjárfestingar á komandi árum.

Í síðari hluta fundarins fóru fram pallborðsumræður með þátttöku sex þingmanna, einum frá hverjum þingflokki á Alþingi, þar af fjórum þingmönnum Norðvesturkjördæmis. Fulltrúi Samtaka ferðaþjónustunnar stýrði umræðunum og fundargestum gafst jafnframt tækifæri til að beina fyrirspurnum til þingmannanna.

Í pallborðsumræðunum komu fram ólíkar pólitískar áherslur og hugmyndir um hvernig takast mætti á við þær efnahagslegu áskoranir sem íslenskt samfélag stendur frammi fyrir, meðal annars skuldir ríkissjóðs, hátt vaxtastig, uppsafnaða innviðaþörf og fjármögnun framtíðaruppbyggingar. Þingmennirnir lýstu mismunandi leiðum og áherslum við úrlausn þessara mála og áhrifum þeirra á atvinnulífið, þar á meðal ferðaþjónustuna.

Fundurinn skapaði vettvang fyrir upplýsingamiðlun og skoðanaskipti milli fulltrúa ferðaþjónustunnar, stjórnmálamanna og annarra fundargesta. Vonir fundahaldara standa til að framsögurnar og umræðurnar og þau sjónarmið ferðaþjónustunnar sem þar komu fram nýtist þingmönnum í áframhaldandi störfum og við ákvarðanatöku um málefni sem varða framtíð ferðaþjónustunnar.

Hægt er að horfa á útsendingu SAF hér.