Ný flugleið frá Portúgal opnar möguleg tækifæri fyrir Vesturland

Portúgalska flugfélagið TAP Air hefur tilkynnt að það muni hefja beint áætlunarflug milli Keflavíkurflugvallar og Lissabon vorið 2027. Flogið verður þrisvar í viku frá 1. apríl til 28. október og mun leiðin jafnframt bjóða upp á greiðar tengingar við fjölmarga áfangastaði í Suður-Evrópu, Afríku og Suður-Ameríku.

11.11.2026

Þessar fréttir eru sérstaklega jákvæðar fyrir ferðaþjónustu á Vesturlandi, þar sem portúgalski markaðurinn hefur verið í miklum vexti á undanförnum árum. Tölur frá Hagstofu Íslands sýna að gistinóttum portúgalskra ferðamanna á Vesturlandi hefur fjölgað verulega á því tímabili sem nýja flugleiðin mun starfa.

Á árunum 2020 til 2025 þróuðust gistinætur ferðamanna frá Portúgal á Vesturlandi á tímabilinu apríl til október með eftirfarandi hætti:

2020: 93 gistinætur
2021: 480 gistinætur
2022: 1.805 gistinætur
2023: 1.780 gistinætur
2024: 1.904 gistinætur
2025: 2.255 gistinætur

Árið 2025 féllu um þrír af hverjum fjórum gistinóttum portúgalskra ferðamanna á Vesturlandi innan þess tímabils sem TAP Air hyggst fljúga til landsins. Þróunin bendir til að eftirspurn frá þessum markaði sé þegar orðin umtalsverð og að nýja flugleiðin geti stutt enn frekari vöxt á komandi árum.

Með tengimiðstöð TAP Air í Lissabon skapast jafnframt ný tækifæri fyrir Vesturland til að ná til ferðamanna frá fleiri mörkuðum en Portúgal einum saman.

Nýja flugleiðin er því ekki aðeins góðar fréttir fyrir þá sem vilja ferðast milli Íslands og Portúgals heldur einnig mikilvægt tækifæri fyrir ferðaþjónustu á Vesturlandi til að styrkja stöðu sína á vaxandi og spennandi erlendum markaði.