Vesturland heldur sterkri stöðu sem áfangastaður ferðamanna

Nýjustu tölur Ferðamálastofu staðfesta að áhugi erlendra ferðamanna á Íslandi er áfram mikill. Á tímabilinu frá júní 2025 til maí 2026 fóru rúmlega 2,27 milljónir erlendra ferðamanna frá landinu um Keflavíkurflugvöll, sem er 1,2% fjölgun frá fyrra ári. Langflestir heimsóttu Ísland í fríi og meðal dvalarlengd var sjö nætur.

22.07.2026

Vesturland heldur áfram að vera einn af vinsælustu landshlutum landsins. Nær helmingur allra erlendra ferðamanna (48%) heimsótti svæðið á tímabilinu og 30% gistu á Vesturlandi. Þessar tölur undirstrika mikilvægi landshlutans sem áfangastaðar og sýna að sífellt fleiri velja að verja hluta Íslandsferðar sinnar á Vesturlandi.

Ferðaþjónustan á Vesturlandi fylgir að vanda árstíðasveiflum, þar sem mest eftirspurn er yfir sumarmánuðina. Herbergjanýting á hótelum er þá mjög góð og endurspeglar vinsældir svæðisins meðal innlendra sem erlendra gesta.

Bandaríkjamenn eru áfram fjölmennasti hópur erlendra ferðamanna á Íslandi, en jafnframt hefur ferðamönnum frá mörgum öðrum mörkuðum fjölgað, meðal annars frá Kína, Frakklandi, Ítalíu og Danmörku. Þessi þróun skapar spennandi tækifæri fyrir ferðaþjónustufyrirtæki á Vesturlandi til að höfða til sífellt fjölbreyttari hóps gesta.

Vesturland býður upp á einstaka blöndu af náttúru, menningu og afþreyingu. Hvort sem ferðamenn koma til að upplifa Akranes, Snæfellsnes, Borgarfjörð, Hvalfjörð eða Dalina, sýna nýjustu tölur að svæðið er orðið órjúfanlegur hluti af ferðalagi margra sem heimsækja Ísland. Hægt er að nálgast útgáfuna hér.